"یہ وہی ہیں جنہوں نے مجھے طلب حدیث کا شوق دلایا، اُنہوں نے میری لکھائی دیکھ کر فرمایا: ’تمھاری لکھائی محدثین جیسی ہے۔‘ اُن کا یہ قول میرے دل میں گھر کر گیا اور میں نے اُن سے سماع کیا اور اُن کے ذریعہ کئی علوم میں مہارت حاصل کی۔" (الدر الکامنہ: 238/3)

"میں امام اسحاق بن راہویہ رحمہ اللہ کی بارگاہ میں حاضر تھا کہ آپ نے فرمایا: ’کاش تم میں سے کوئی ایک ایسی کتاب لکھے جس میں صرف رسول اللہ صلی اللہ علیہ وسلم کی صحیح احادیث ہوں۔‘ امام بخاری فرماتے ہیں کہ: یہ بات میرے دل میں اُتر گئی لہذا میں اس کتاب کو جمع کرنے میں لگ گیا۔" (ملخصاً من التوضیح لابن ملقن: 28/2)

ابو محمد عبد اللہ حارثی رحمۃ اللہ علیہ اپنی سند سے امام ابو حنیفہ سے روایت کرتے ہیں کہ انہوں نے فرمایا: "ایک دن میں امام شعبی رحمۃ اللہ علیہ کے پاس سے گزرا تو وہ بیٹھے ہوئے تھے، انہوں نے مجھے بلایا اور فرمایا: ’کہاں آنا جانا رکھتے ہو؟‘

میں نے جواب دیتے ہوئے کہا: ’فلاں کے پاس جاتا ہوں۔‘

امام شعبی نے فرمایا: ’میری مراد بازار نہیں، بلکہ علماء کے پاس جانا تھا۔‘

اس پر میں نے کہا: ’میں اُن کے پاس کم ہی جاتا ہوں۔‘

اُنہوں نے فرمایا: ’ایسا نہ کرو بلکہ تمہیں تو علم و علماء کی مجالس کی طرف توجہ دینی چاہیے۔ بے شک میں نے تم میں بیدار مغزی و ذہانت دیکھی ہے۔‘

امام اعظم رحمۃ اللہ علیہ فرماتے ہیں: اُن کی اس بات نے مجھ پر بہت اثر کیا اور میں نے کاروبار ترک کیا اور علم حاصل کرنے لگا۔ اللہ پاک نے ان کی بات کی وجہ سے مجھے بہت نفع عطا فرمایا۔" (عقود الجمان: 64)

"میں علم حاصل کرنے کے لیے پہلے امام زفر رحمۃ اللہ علیہ کے پاس جایا کرتا تھا، جو مسئلہ مجھ پر دشوار ہوتا میں اُن سے اس مسئلے کے متعلق سوال کرتا تو وہ میرے لیے اس مسئلے کی وضاحت کرتے لیکن میں سمجھ نہیں پاتا تھا۔ بالآخر جب میں نے انہیں تھکا دیا تو اُنہوں نے فرمایا: ’تیری خرابی ہو، نہ تم میں صلاحیت ہے اور نہ ہی تمہیں کوئی نفع ہوتا ہے، مجھے نہیں لگتا ہے تم کبھی کامیاب ہو پاؤ گے۔‘

میں کہتا ’نہیں۔ کچھ چیزیں سمجھ آئی ہیں اگرچہ اپنی چاہت کے مطابق مکمل سمجھ نہیں پایا ہوں‘، تو آپ رحمہ اللہ تعالی علیہ فرماتے: ’تم اپنی مراد کو پہنچ ہی جاؤ گے۔ جو بھی چیز کم ہوتی ہے آخر کار اپنی غایت کو پہنچ ہی جاتی ہے، تم صبر کرو مجھے لگتا ہے کہ...‘"

استاد کے کہے پر عمل کیا تو بالآخر ایک وقت آیا آپ رحمہ اللہ تعالی علیہ امامت کے درجہ پر پہنچ ہی گئے۔